新鴻基地產創辦人郭得勝90年因心臟病逝世。郭炳江曾說，父親彌留之際，他在床邊承諾一定繼承父志，三兄弟同心協力把新地發展成全港以至全球最大的地產公司。對於父母，郭炳江說：「父親係一個rolemodel（角色模範），但母親喺屋企係好重要。」
周日是母親節，對郭炳江來說，在生活中真正帶領三兄弟走出人生低谷、帶領他們將新地繼往開來的，正是其母親鄺肖卿。富豪第二代要超越第一代的成就殊不容易，但證券界一致認為，郭氏兄弟是一個異數，除了秉承父親郭得勝務實勤儉的作風外，更將新地發展成數千億市值的王國。郭炳江說，真正教懂他們三兄弟金錢的概念，為他們塑造正確價值觀的人其實是母親。
郭炳江憶述，中學時期（60年代末）母親每星期只給予他們6元零用錢，這已包括車費及午餐。但郭老太同時訂出一套賞罰制度，「佢平時一啲零用錢都唔畀我哋，但每一次測驗、考試，如果你考到90幾分，就賞5蚊或者10蚊，考第一有幾百蚊。嗰陣時爸爸畀一筆錢作家用，因此呢筆獎金又係（媽咪）自己拎出嚟。」
三兄弟逐分逐毫將獎金儲埋，享受努力得來的成果，金錢價值觀亦由此建立。經過努力換回來的一分一毫，郭炳江特別珍惜，「我最開心就係嗰排成績好就有錢，個錢罌爆棚，拎去恒生銀行，喺個櫃面，我睇住佢（銀行櫃員）數，一毫子、一百蚊咁數。我驚佢呃我吖嘛，血汗錢嚟，當然要睇清楚。」
郭炳江眼中的郭老太，是一個學識普通，但目光遠大的人。「我媽咪英文又唔識、中文程度又唔高，但佢了解到讀書嘅重要。」在其他富太太打麻雀過日辰的時候，郭母卻將家用花在聘請最好的補習老師給孩子。
「父親限咗家用畀我媽咪，其實我媽咪有好多選擇，嗰時好興打麻雀，我媽咪唔打，選擇將啲錢幫我哋請補習先生。嗰時啲親戚都批評佢，話使乜補習，讀書咪得囉，我爹哋都係白手興家，李嘉誠都係讀到Form3。」