港股噚日嘅表現，真係出乎九成九嘅人意料之外。美股周三晚大升，由於之前好多人做淡，所以一挾起嚟，淡友紛紛平倉，令升勢一發難收。杜指大升逾300點，納指更飆升122點，好多人都諗住港股今次點都可以借勢而上，衝破12000大關阻力，但港股除噚日早段高開外，全程都好令人失望。
恒指噚日高見11962，升193點，12000都唔到，之後就反覆走低，結果倒跌收場，恒指報11700，下跌67點，成交110億元，期指更低收11668，低水32點。其實港股喺前日已轉弱，大戶明顯係要㩒住個市，所以，噚日港市唔跟美股大升，一啲都唔奇，而做到跌市收場，目的亦只係要打擊股民嘅信心而已。照睇大戶嘅部署，唔排除會再試多一次11500至11600水平嘅支持，然後再上衝12000大關。現水平整固嘅時間愈耐，衝關嘅力度愈強。
藍籌榮辱互見，國企就升咗化工股，會否成勢，要睇多一兩日。個別股票方面，百仕達（1168）升破1元大關，高見1.03元，收0.98元，升5仙，已達到本欄推介時的目標。華潤勵致（1193）午市高收1.01元，升6仙，午後停牌，涉及配股集資，以及發行可換股債券，向母公司收購半導體業務，勵致積極擴展業務，中長線仍可看好。
第一太平（142）噚日跟市調整，但在10日及20日線（1.345元）水平獲得支持，收1.36元，跌2仙，成交繼續減縮，現階段形成的旗形整固有可能接近尾聲，可候低吸納，若見升破1.4元阻力，可加碼，短線量度升幅目標為1.65元。
一太持有49.2%的印多福，以及24.6%的菲律賓長途電話，單計所佔權益的市值已達70億港元（一太噚日嘅市值只為42.7億元），單此兩項權益，每股一太已值2.2元。業績方面，估計今明兩年每股盈利分別為0.16及0.2元，以PE10倍計，年底一太股價可升上2.0水平。
郭兆誠