早前有傳傅天穎（奀妹）因不滿星皓力捧林嘉欣及張燊悅，有意與公司提前解約，但最近積極喼弗的奀妹，強調自己只是未適應公司轉組才出現誤會。奀妹謂人生像坐過山車，有起有落，最緊要識享受人生。
有傳傅天穎（奀妹）不滿所屬的星皓力捧林嘉欣及張燊悅，備受冷落，故向公司主動提出解約。日前奀妹在清水灣拍照時否認說：「我唔係同公司解約，之前係因為公司嘅經理人部門轉組，我一時間未適應至會有誤會，解約只係謠言。」
作為星皓第一代力捧新人，奀妹自言從未對公司改捧其他新人如林嘉欣及張燊悅而呷醋，她說：「公司捧人係一個又一個，今年捧嘉欣，下年捧嘅可能又係另一個，呢啲係公司嘅行政策略，況且每個人都要經歷一啲唔同嘅階段。」
早前奀妹放了一個月大假，返台灣充電休息，她回港後已開始積極喼弗，希望以全新姿態再戰娛圈，而她亦不擔心其他新人冒起會影響自己，她笑說：「講實力嘅，我每一年都當自己係新人，我嘅心態真係咁㗎，如果唔係會覺得自己好易out。嚟緊我會多啲留喺香港，公司遲啲開戲，前幾日我都返咗公司試鏡，我諗自己都會唱番歌。」
原來奀妹與曾為她出碟的陳容森仍有合約，雖然陳容森曾揚言要雪藏奀妹，但奀妹卻說：「出碟嘅嘢我留番公司幫我處理。啲事過咗就算，人生有如過山車，最緊要積極，同埋識得享受人生。」
採訪：朱芷瑩
攝影：仇志德
髮型：HeadquartersbyDereck
服裝提供：A/T、OZOC、GUESS
泳裝提供：PrivateShop