任賢齊喺下個星期四（十六日）喺紅館舉行三場個唱，佢最近喺台灣練歌、練舞，咁啱個唱嘉賓莫文蔚（Karen）亦喺台灣，做緊新碟宣傳。日前佢哋就約埋練歌，Karen連晏晝飯都未食就去搵小齊，重帶埋最新大碟送畀佢。
Karen同小齊曾經傳過緋聞，今次佢肯再為對方做個唱嘉賓，佢話：「因為小齊係一個好男人，我幫多佢一次，佢就欠我多個人情，第日慢慢還畀我。」
Karen知道小齊會喺個唱中跳笨豬跳，又叫佢要小心啲。而小齊對Karen嘅評語：「佢樣樣都好，我叫佢幫手佢都應承，惟獨佢唔同我講廣東話，搞到我廣東話都冇進步。」
另外，張信哲係嘉賓之一，張信哲見到小齊成日打鼓，笑佢係咪想做十項全能歌手。
黎明幫有線電視唱世界盃宣傳歌，無綫就搵李克勤唱世界盃歌曲。克勤噚日去咗無綫電視城拍世界盃宣傳歌《勝利》嘅MV，佢話：「個MV加咗好多足球特技。」有報道指黎明為唱有線世界盃歌曲，損失咗三千萬，克勤就話：「我唔單止冇損失，重多咗人氣同曝光率，無綫重加咗我兩嚿水（即二百元）人工。」
樓茜妮噚日去咗銅鑼灣出席亞視活動「愛心虛擬騎術大賽」。
樓茜妮最近肥咗少少，佢話：「我之前睇咗報道話黃卓玲因荷爾蒙失調，停經三個月同肥咗好多，我最近都有呢個情況，一樣停經三個月同水腫。我睇過醫生，佢話要食藥調理吓。」
陳慧琳（Kelly）日前喺台灣，為最新國語碟開記者會時，正東高層黃栢高都喺現場，不過當日有單漏網新聞。
當記者問Kelly假若去EMI，會否影響王菲嘅一姐地位時，Kelly竟然無厘頭咁話：「林憶蓮唔係要去正東咩！」講完Kelly重望咗黃栢高一眼，唔知係咪驚地位受威脅？
韓國樂壇天后朴志胤噚日到台灣，準備聽晚喺台北南港101舉行嘅演唱會，本來朴志胤會喺個唱入面大跳火辣鋼管舞，喺兩支鋼管之間大跳誘人勁舞，但唱片公司因星形舞台地方唔夠大，擔心安全問題，又怕遭受輿論抨擊，所以最後取消呢個環節。
吳彥祖同黃家諾好鬼老友，上星期二，馮仁昭個朋友見佢哋一齊喺深水灣滑水，除咗佢哋兩個之外，重有一位男性友人同一位模特兒身形嘅外籍靚女，唔知呢個靚女會唔會係吳彥祖嘅真命女友呢？馮仁昭個老友重聽聞吳彥祖同黃家諾，原來喺嗰日凌晨四點幾已經去咗深水灣度玩，一玩玩咗七個鐘。
香港電台噚日公布「2002電視節目欣賞指數調查」第一階段嘅調查結果，排頭三位節目分別係港台嘅《鏗鏘集》、《有線新聞》及無綫嘅《新聞透視》。而港台嘅「獅子山下經典現特輯」就佔第六位。
而無綫劇集《法網伊人》則佔第二十二位。
本來香港嘅動作指導熊欣欣有份參與西片《蜘蛛俠》，事關嗰部戲原本有一場係講恐怖分子襲擊美國紐約世貿中心，喺呢場戲拍好之後，電影公司諗住再補拍多幾場動作場面，於是搵咗熊欣欣去負責。點知後尾遇上美國九一一事件，電影公司惟有將呢場戲取消，熊欣欣無緣同《蜘蛛俠》合作，真係覺得好可惜。