中信泰富噚日開股東會，主席榮智健對公司過往兩年股價積弱及分析員批評好介懷，佢話：「好多分析員（後改口話有啲分析員）對公司有誤會，霸菱講啲嘢可以理都唔使理，根本係無知」。此語一出，八方當堂打個突，以為霸記講得佢公司好衰，有記者重即時打電話去霸記查吓邊個分析員激到榮大董咁勞氣。
一問之下，先知此君原來叫梁啟棠，不但曾將中信泰富的評級降至「沽售」，亦曾把「沽售」評級送過畀和黃。梁氏同八方講，佢唔想就榮大董嘅言論作回應，但講明不會因而對中信評級有所改變。
查梁氏早在前年八月，已因市場對中信光纖業務過份樂觀，股價大幅高於資產淨值下，已將中信評級由「購入」調低至「持有」，去年三月再因該公司太多基建資產而將之視為基建股，將評級降至「沽售」，但今年三月（即中信泰富出售光纖股權給母公司後），已將評級調升回「持有」，而四月初報告內容更是中間偏好，八方唔明榮大董何以今次才扯火。
（圖）評級事件已發生在兩年前，榮大董實在不必太介懷。
E-mail：