新車速報：
奧迪A42.0Multitronic特別版　25萬車價有號召力

自去年上旬，全新打入香港市場嘅德國奧迪A4車系，一直都有唔錯嘅口碑，而銷量亦見持續上升；代理方面為要進一步拓展市場嘅佔有率，更新近引入一部A42.0Multitronic特別版。雖然部車刪減咗部份設備，但看來仍無損佢嘅誘人魅力呢！加上定價只係25萬，相比同級對手自然更有瞄頭啦！

記者、攝影：陳偉林

外形討好不落俗套
予人有感時尚不落俗套嘅賣相，跟原有A4車系沒有太大分別，只係原有Xenon頭燈改換上Ellipsoid聚焦設計，以及改換上四輪15吋合金軨而已；單係外觀睇嚟，仍見有豪邁富活力嘅一面呢！

配套精簡無損豪邁感
講到車廂鋪排，前後高級皮椅配搭之餘，前排重有全方位電控配備；惟後排刪減咗中置頭枕同三點式安全帶，看來仍無減一份舒適感。然而，車廂無咗電鍍裝飾同電天窗組合，卻有感平淡一點；設備配搭除四門電窗、門邊電鏡及中央門鎖外，當然唔少得重有原廠恒溫冷氣同高級音響組合，重有前後共八個安全氣袋同充氣簾幕保護㗎！

引擎配套代步至合意
呢部A42.0Multitronic特別版，以一台2.0公升直4偈，匹配6前速半自動波組合，僅刪減咗原有軚盤+/-轉檔按鍵，但引擎表現仍見順暢同寧靜度。而四輪出眾嘅懸掛設計，匹配原車嘅ESP、EBD連ABS等多套主動及被動電子系統，走彎時仍見有出眾嘅循迹性同制動效果呢！