李健仁打從十年前的電影《武狀元蘇乞兒》開始，便利用「如花」一身令人「噴血」的嬌俏造型行走江湖。他日前應本報記者邀請，再次男扮女裝，在其位於銅鑼灣的時裝店，戴上足足有42D的胸圍，演繹闊太版及墮落版「如花」，可謂十分搞笑。
如花李健仁其實從小已在片場打滾，他說：「我老竇係電影攝影師，所以我細細個已經喺片場周圍走，好鍾意電影，之後二十歲第一次正式做演員，喺嗰套《愛人女神》入面飾演譚詠麟嘅同事，嗰次拍咗六日戲，導演話我乖，畀多兩日人工我，但之後我就返咗內地搞酒樓。」
那麼李健仁是何時開始扮女人？他說：「講起就搞笑，記得有日我走去探星仔班，佢拍緊《武狀元蘇乞兒》，去到佢就拉住我入化妝間話：『阿仁，幫幫手呀！』我又唔知乜嘢事，化完妝之後，見到自己，嘩？嚇死我，做乜變咗個人妖出嚟？
「但佢哋個個見到都讚好，星仔重要我戴耳環胸圍，加胸墊咁，不停同我度形象。記得第一次扮女人乜都唔識，導演叫擘大個口就擘大口！之後拍《九品芝麻官》又係扮女人，王晶見到我重即刻幫我改咗『如花』呢個名，聽完之後幾有feel呀，真係多得王晶呀！」
從開始到現在，李健仁扮演如花的次數也有五十多次，究竟他可有厭倦過扮女人？又有沒有想過變性做真女人？
如花笑着說：「咁又冇厭倦喎，反而愈做愈投入，愈過癮。我結咗婚㗎啦，明白自己係一個男人，點會去變性喎，但講真同我合作過嘅女演員都當我姊妹咁，好似CoCo咁，重話搵我一齊扮Twins登台㖭。」