向來形象大癲大肺的陳淑蘭進軍才女行列，並以食經打響頭炮，書中介紹的食肆，陳淑蘭均會親自去試食。她還說入娛樂圈之後，臉上多了兩粒痣，分別是是非痣及為食痣，而手背長了的一粒痣，可以執筆搵食。
陳淑蘭（蘭子）繼執筆本報專欄《蘭得第一次》後，正積極籌備出書做才女，與曾參選「工展小姐」的金凌（現為製作公司老闆）合作，在七月推出一本飲食雜誌。
蘭子為了籌備出書，近日不停試食，在將軍澳品嘗上海菜後又到銅鑼灣吃法國菜，蘭子日前說：「起碼重要食多三十至五十間，原則上我一定要食過，真係好食先介紹畀讀者，不過咁食法，都驚會好快肥。我哋已經同啲食店講好，我哋介紹佢哋間餐廳，佢哋會做善事捐錢畀奧比斯眼科飛機醫院。」
蘭子表示自參選港姐後，多了三顆細小的痣，蘭子說：「唔知由幾時開始，喺顴骨多咗一粒痣，聽講呢粒會多是非。嘴角下又多粒痣，呢粒係為食痣，所以成日有機會同圈中識食之人周圍食。至於手背上亦多咗粒痣，人哋話呢個位有痣係可以執筆搵食喎。」
蘭子一向予人大癲大肺的印象，問她是否想擺脫儍大姐形象，轉型做才女，蘭子說：「其實有機會搞笑我都唔介意，不過唔同年紀都想試唔同嘅嘢，而且好多朋友都開始寫書，好似傅明憲就係其中一個，唔知係咪畀佢薰陶得多，再加上寫專欄之後，都有好多迴響，畀咗我好大信心。」
曾經參選工展小姐的金凌，則表示與蘭子非常合拍，她說：「我對蘭子好早已經有印象，而且大家都鍾意食，所以好夾。」
採訪、攝影：卓美娟