經紀黃果然有料到，佢上個月話裕元工業（551）減持唯冠（334）唔係壞消息，因有強者接貨。
事隔剛好1個月，唯冠噚日出現大手成交後，股價即急升，最高見過1元，收98仙，升10％。
經紀黃話，原來今次都係裕元減持，以每股82仙，減持8800萬股，上次就以每股78仙，減持6000萬股或9.44％權益，經過兩次售股之後，裕元所持嘅唯冠，已經盡落入鬼佬基金手中，所以隻股急升。
至於基金點解睇好唯冠？經紀黃話同上次接貨嘅理由一樣，都係睇好公司有機會復甦。由於隻股噚日急升，今日可能會有回吐，所以經紀黃叫小初等股價回落後，先至諗上車。
至於公布批公司輪嘅上海策略置地（2930），復牌後急升9.8％，收39仙，成交重有成億銀咁多。經紀陳話，隻股嘅炒作手法，極似光通信（603），可能係上海幫嘅傑作。
慕容小初