八方平日都鍾意上網，噚日就發現一個幾得意嘅調查，有國際互聯網調查公司話香港有成七十一萬網友上色情網頁，比起舊年足足多咗四成，增長率之高，喺亞洲排第二，網友平均每日重用成七十二分鐘嚟睇㖭，而且當中三成（約二十一萬）係學生哥；而南韓人睇鹹網嘅增長率則達七成二，係亞洲第一。八方睇完之後，第一時間就諗起香港唔少學生哥去嘅網吧。
最近網吧開到成行成巿，旺區好似銅鑼灣、旺角和深水埗等，都有幾間通宵網吧，重由朝到晚都有學生哥出出入入，連明光社總幹事蔡志森都話網吧好容易引誘細路仔睇色情網頁，成日叫政府立法規定網吧裝過濾軟件，同唔准未滿十八歲人士進入。
不過，身為業內人士的香港網絡媒體業協會副主席吳冠輝就唔同意呢個睇法，佢話：「要睇鹹網都等阿爸阿媽日頭唔喺屋企，匿埋屋企睇，點會夠膽喺大庭廣眾嘅地方睇呢？」聽落又講得幾有道理喎。
（圖）有國際互聯網調查公司發現全港有七十一萬網民瀏覽色情網頁，當中學生哥更佔二十一萬人。
E-mail：