概念車：
平治VisionGST　概念形象突出

平治車廠為迎合用家喺未來嘅需要，故設計出一部名為VisionGST嘅概念車；此車除集多款車種特性於一身外，先進嘅車廂設備及突出嘅性能表現，更係賣點所在。有興趣嘅朋友，不妨留意一下今日嘅介紹喇。

記者：鄭達基

集多款車型於一身
VisionGST嘅GST，其實係解作GrandSportsTourer，而此車更係糅合咗房車、旅行車及SUV等多類型車款嘅特性於一身，以迎合未來用家嘅需要；話說回頭，VisionGST不但擁有一個流線型嘅車體外，匹配直徑達22吋嘅跑車胎軨組合，望落極具跑味之餘，對開式車門設計，更能方便乘客進出車廂㖭。

5.5公升V8引擎動力強勁
另外，廠方又為呢部VisionGST概念車，配用一台由AMG所提供嘅5.5公升V8引擎，馬力輸出高達360匹，不但能為其提供有充裕嘅動力之外，再加上有多套系統，如4籸TS、全新嘅AIRMATIC氣壓懸掛，同埋SensotronicBrakeControl(SBC)等等嘅輔助，從而令VisionGST可有不俗嘅性能表現；而闊大嘅車窗配搭，亦可給予車上乘客及駕駛者有更佳嘅視野範圍。

車廂寬敞舒適度高
至於車廂方面，VisionGST概念車能為乘客帶來寬敞嘅乘坐空間外，而天幕式嘅車頂設計，更能令車廂變得更開揚；另外，以人手製作嘅車廂裝飾，望落亦予人有豪邁之感。中控台上設備亦見齊全，除有音響及其他設備嘅控制鍵外，一套全新設計嘅導航系統，亦能為你提供更準確嘅資料㖭。