私隱新聞 - 左丁山

私隱新聞 - 左丁山

賓架李事件見報後,好多記者搵人做反應。此乃標準動作,譬如乜人都搵唔到就搵劉兆佳大教授,豬肉枱冇豬肉賣就搵雷鼎鳴教授,電燈原油就搵林本利教授……總之記者最緊要就手,手到拿來,第一時間肯覆call者最受歡迎,各位名人、學者想見報嘅話,第一招就係寫落call機號碼畀記者,第二就係有問必覆,上自太空,下至名人婚外情,以至中東戰爭,都可以扮專家。
公關大姐大亦接到電話。記者問:「李生發生咁嘅事,假如你係公關,教佢應該點辦?」大姐大答:「成年人嘅婚外情,只應向太太負責,佢只應向太太解釋,唔需要向公眾交代。」記者又問:「佢噃,有冇誠信問題,影響銀行呀?」大姐大答:「佢就係成年男士,私事唔使向你我或全世界講。至於銀行公事,董事會滿意佢嘅表現就得,股民投資者要注意嘅係私事會唔會影響公事,假如銀行繼續賺錢,股價與大市表現差唔多,股民自會判定,香港係自由市場,每日股價上落已可反映投資者嘅集體意向、集體判斷,你講甚麼誠信問題,唔使我哋猜度。」記者再糾纏甚麼公眾人物誠信問題,大姐大不勝其煩。大姐大話:「嗰位記者可能未結過婚,不知人世間,男女之情最是弄人。假如太太原諒體諒,其他人有乜資格講嘢呀。佢哋抓住誠信問題,只係為咗justify自己報紙大做名人私隱新聞啫。」左丁山完全同意大姐大嘅觀點,香港𠵱家慣咗挖糞為樂,但又唔肯認,咪以「誠信」為虛偽嘅擋箭牌囉。