話自己係日本漫畫《足球小將》Fans嘅迪比亞路，如果知道自己喺新一輯內只係二打六，唔知會有乜嘢反應呢？
喺《足球小將─ROADTO2002》裏面，除咗主角戴志偉、李華爾同史奈達等主角之外，現今世界球壇嘅知名球員好像施丹同費高等，都有化名出現。不過，呢本漫畫嘅作者高橋陽一就唔係太畀面迪比亞路。
雖然迪比亞路話過好細個經已睇《足球小將》，點計都算係高橋嘅Fans；但係高橋喺漫畫裏面講到迪比亞路渣渣哋，重要連小志強都撞唔贏，如果迪比亞路睇到新一輯漫畫，唔知重會唔會幫人免費宣傳呢？
不過，我求大俠就覺得迪比亞路唔使咁介懷，今屆打好啲，畀個好印象啲日本球迷咪得囉。
黃蜂喺頭兩場作客網隊都輸波收場，但係唔好諗住佢哋喺第三場返到主場後會佔上風，皆因夏洛特嘅市民因不滿黃蜂下季「搬竇」而杯葛比賽，好似首圈嘅兩場主場賽，全場二萬個座位只得九千幾人入座，場面鬼死咁冷清；班球員當然咁冇晒癮，搞到「主場之利」變成「主場不利」。
網隊教練史葛最近真係好黑仔，佢諗住攞硬嘅最佳教練獎最後要拱手相讓，最近又盛傳手下愛將傑特，好可能大熱倒灶攞唔到MVP，搞到史葛破口大罵。黃蜂教練史拉斯乘機火上加油，話自己都諗住袋梗個最佳教練獎，點知最後不翼而飛云云。激到史葛生蝦咁跳，呢招心理戰真係絕。
曾經去日本打波嘅前德國國腳列巴斯基，教班德國國腳如果想喺今屆世界盃，贏得日本球迷嘅歡心；就要好似佢以前咁，花幾粒鐘幫佢哋簽名。無錯，咁做可以同日本啲球迷打好關係，但德國係去爭世界盃，與其花幾個鐘頭搞關係，不如落力啲練習好過。
𠵱家養緊傷嘅曼聯英格蘭中場碧咸，前晚好罕有咁同老婆維多莉亞，一齊去奧脫福球場捧曼聯場，但就睇到一個佢最唔想見到嘅戰果。曼聯輸畀阿仙奴都不特止，最慘重要俾對方喺自己嘅球場封王，簡直瘀到痹。希望碧咸喺傷愈復出之後，下屆可以幫曼聯爭番口氣！
求驗客手記逢星期一至五刊出
E-mail: