股海實戰錄:守住裂口仍睇好

股海實戰錄:守住裂口仍睇好

美股前晚升勢如出籠猛虎,杜指升305點,納指更升7.8%。滙豐(005)及中移動(941)亦喺外圍大幅造好,滙豐高見99元,噚日期指高開逾200點,12020附近追貨者眾,點知大戶調轉嚟做,實行先殺跟風做好嘅炒家,恒指不但破唔到萬二關,最後重要倒跌67點,收11700,日線圖更出現「穿頭破腳」嘅大陰燭,技術走勢明顯轉弱。
港股周二應升未升,加上出現大成交,已浮現派貨迹象,雖然趙飛雲唔肯定係派貨定係震倉,但安全計亦先作減持,噚日證明唔係杞人憂天,早市睇見恒指先高後低,喺11850反彈無力,亦將和黃輪9110於0.58元沽清,離場觀望。

11600附近博反彈
恒指噚日高開低收,技術形態難免轉差,9RSI亦出現背馳,10日線目前喺11623,而裂口支持位於11577,以上區域係第一道防線,如果守唔住,將回補裂口11577-11497水平,甚至考驗250日線11471支持。
估計恒指屬整固機會較大,以上兩個支持區可伺機吸納恒指Call輪9045博反彈。如果恒指調整只限於11577之上,則形勢利好後市,升破萬二關嘅機會依然存在。
趙飛雲