港股高位徘徊，大家都好難估計後市會點樣走法，二三線股唔理咁多，抽咗水至算。噚日又有多隻股份話要配股集資，其中康健（8138）傳以每股0.20元配售1.38億股，集資2760萬元，大幅折讓24.53％；遠東生物制藥（399）亦較股價折讓14％，以每股2.45元配售最多6000萬股新股，集資1.23億元。2股咁大幅折讓配股，後市唔俾人掟貨就奇。
邦盟滙駿（8158）上午急升28％後，午後亦停牌表示要配股，據聞只配畀自己友，冇貨出街。呢手貨如果真係配咗畀有心人士，相信復牌後有炒作，而呢次配售亦可能係賣殼嘅前奏。此股噚日收0.32元，黑客話短期會見0.35元。
實力國際（519）搞掂旗下實力中國（472）供股計劃後，股價連日大升，噚日勁升逾50％，究竟兩股急升之後重有冇動作跟尾，暫時重未知，但股價就隨時會大幅回吐，跟炒者要小心。
早前被人斬倉嘅鈞濠集團（115），噚日又傳出賣殼好事近，據聞公司可能配售新股收購生化科技業務，藉此出售控制性股權。不過此股每次升至0.14至0.15元就有大戶出貨，消息係咪信得過則好難講。鈞濠收0.15元，升2.74％。
港股噚日表現反反覆覆，缺乏方向，恒指收報11768，跌27點。大市成交就算唔計山東國電（1071）逾10億元配售成交上板，都超過100億元。
澳洲及南韓同時宣布加息1/4厘，反映亞太區部份國家擔心本土經濟可能過熱，資金有可能由其他區內股市流入仍然落後嘅港股。
阿 虎