近排凡係外資大行品題過嘅二三線股，幾乎全部都炒到飛起，好似自然美（157）、捷美（702），精優藥業（858）咁，至少都有一日半日急升到你唔信。
對於精優，小初就有多少印象，因為之前有個大陸炒家同小初提過呢隻股，佢話隻股原本由大陸炒家負責，但因為被A股市場困住一大筆錢，冇水炒上批股，所以一直喺市場上周圍搵人幫手。
經紀陳話，睇怕都係好彩同埋市況相就，佢今次一搵就搵到外資行幫手，相信會有一番作為。
雖然精優噚日高開低收，微跌1％，收46仙。但經紀陳話幫手嘅外資行仍會繼續買入，所以俾多啲耐性等吓，應該會有表現。
講開外資行，據講上海置業（1207）幕後炒家亦搵到某大外資行幫手，唔知會否重演另一個神話？隻股噚日雖然只係升4.9％，收1.07元，但成交就急增，唔知係咪交緊貨。
慕容小初