近半年來香港的市面似乎籠罩着一片愁雲慘霧，各份報刊頭條新聞，幾乎每日都離不開自殺或被殺消息，社會上各階層及慈善團體均表示關注，其中基督教香港信義會更率先成立「生命天使」計劃，希望透過人與人之間關懷，令更多人學懂珍惜生命；而另一個原本打正商業旗號「香港女商家協會」，亦鑑於近年太多女性輕生，特別設立一條輔導熱線，替有經濟困難婦女提供協助。
不同的自發性救助活動，令人相信，愛在人間。
記者：朱文俊
攝影：陳盛臣
據生命天使教育中心督導主任林兆秀所講，生命天使教育計劃，早在半年前已經展開，當時的對象主要是中、小學生，但近年發覺自殺個案，不再局限是青少年，不少成年人及婦女都面對同樣問題，有見及此，他們認為有需要成立一個跨年齡教育運動，於是便發起一個為期兩年的「生命天使」計劃，起初打算在半年內招募一千個生命天使，但計劃公布後反應良好，現在已經有超過三千人報名參加。
林先生表示：「實在估唔到反應咁熱烈，現在三千個參加者都係個別來電申請，其實我們跟住落去，重會同其他學校、公司及團體舉辦招募計劃，所以人數方面應該重會增長。好多朋友都好有興趣，想知我們點去訓練一個普通人成為天使，其實我們今次推廣呢個計劃，主要係訓練他們在聆聽及表達方面技巧，希望令每個天使，都可以用關懷去影響到身邊的人，令佢喺自己圈子築起一度防線，而且我們強調天使其實都係普通人，所以我們唔會扮演一個輔導角色，只要他們能夠完成兩次課程，之後可以在兩星期內實踐承諾，將生命約章推廣出去給十個朋友，然後填妥『關顧手冊』，並記錄一季內幫助了幾多朋友，幫他們解決了甚麼問題，我們就會寄回一張天使卡及天使證書畀參加者，咁樣做，係希望參加者有一個持續動機，唔會輕易放棄。」
由於參加人數大幅上升，令信義會在資源調配上，無可避免地出現困難，他們現正呼籲各界人士踴躍捐輸，籌集目標為港幣二百萬元，有興趣捐助人士，可直接將善款存入恒生銀行戶口388-558025-668或將支票寄往九龍窩打老道50A信義樓一樓，抬頭請寫「基督教香港信義會社會服務部服務協調處」或「Service CoordinationOfficeofELCSS-HK」。
由凡人到天使，總有一段路要走，成為「生命天使」的參加者，很多亦曾經嘗試過生命的低潮，以下幾位天使的經歷，可作為生活不如意的人一個借鏡。
Wilson：賭仔睇書解心結
「我覺得做人唔應該因為小小事情就去自殺，我自己以前因為賭博問題，令到自己爭人好多錢，加上本身又唔鍾意同人講嘢，當時覺得冇人幫到我，都有諗過想死，到𠵱家我經濟都唔係好好，但係我已經冇諗住要死，因為我學識將自己心事講畀好朋友聽，加上有時間我會睇多啲書，同聽吓音樂放鬆自己，你就會發覺問題唔係咁大不了。」
黃太：做補習幫小朋友
「我本身係做補習，發覺𠵱家小朋友成日都唔係幾開心，有問題又唔敢同父母講，我覺得我哋做長輩，有責任幫佢哋，所以我就嚟參加，希望可以幫佢哋。以前我有個Auntie，原本屋企開髮型屋，後來因為丈夫賭錢，搞到傾家蕩產，要出番嚟打工幫手還債，點知有一日個仔話喺學校俾先生屈，個仔要個先生冇咗份工，就喺屋企跳落街死咗。我個Auntie梗係好傷心，如果我當時識得安慰吓佢，我諗佢會舒服得多。」
Angel：苦茶中粒加應子
「我參加呢個計劃，係唔想辜負我個名，因為我讀書開始已經用Angel呢個名，但係自從96年，我經歷咗失婚、失業、失去自信，連兩隻貓都俾火燒死，當時我覺得點解我鍾意嘅嘢都離我而去，不如死咗去算啦，點知，當時我媽媽突然間中風死咗，雖然對我打擊好大，卻令我明白到親情可貴。跟住我發覺其他人有問題，我去同佢講嘅時候，會好有說服力，啲人會話原來你經歷咗咁多嘢，然後佢哋啲感情問題、情緒問題就會變得微不足道，所以我覺得人生如果係一杯苦茶，我甘願做入面一粒加應子。」
Andy：關心別人世界更美
「我本身係一個義工，覺得呢個時間社會好多負面嘢，希望可以用自己力量，將關心發放出去。我以前有個同事，因為失戀搞到工又唔返，做人又無心機，晚晚掛住飲酒，最後我勸佢不如積極咁去面對人生，人每日都要過，過得今日已經好好彩，所以唔應該自暴自棄，後來佢終於醒覺重新做人，令我覺得只要你肯去關心身邊嘅人，呢個世界會靚得多。」
戴婉婷（右）、王洪怡（左）：
不為一棵樹放棄成個森林
「參加後覺得可以學到好多嘢，我哋覺得自殺係好傻，人死咗就乜都返唔到轉頭。我哋身邊同學最多都係感情問題，我哋會勸佢，唔好為咗一棵樹放棄成個森林。屋企人都好支持我哋參加呢個計劃，起碼可以幫到自己，我哋覺得呢個課程叫做『防止自殺手冊』。」
近年香港經濟轉型，令到失業數字激增，最近香港女商家協會，透過屬下會員成立了一條辦公時間求助熱線，希望幫到有經濟困難女士，令她們可以重投社會工作。該會會長陳慕華Laura表示：「其實好多女人好叻，只不過冇機會畀佢發揮，𠵱家經濟唔好，好多家庭主婦都要面對生活問題，自己老公都失業，冇得依賴，好多人尋死都係因為冇錢，所以我哋個會成立一條求助熱線，除有專業心理學家幫助解決情緒問題，重會無條件幫有需要女性搵工，我哋個會有一百多個會員，可以首先要請呢批求助者，若覺得自己冇工作技能，我哋會免費提供一啲教儀容、與人溝通，甚至銷售技巧，等你容易啲重返工作崗位。其中一啲冇乜學歷女士，我哋可以用批發價畀啲貨佢賣，啲貨全部喺街有得賣，佢重可以搵到客路，先上嚟買貨，但當然我哋只可以幫佢捱過難關，日後如果佢做得好，買貨就要跟番一般程序。」
女商家協會求助熱線：31058200
其他求助熱線
社會福利署：23432255
人間互助社聯熱線：1878668
明愛家庭危機支援中心向晴熱線：18288
香港撒瑪利亞防止自殺會：23892222
珍惜生命預防長者自殺計劃：23820881
信義會太陽菊青少年生命教育計劃：27108313