睇嚟冇英格蘭球員想喺今日收到國家隊領隊艾歷臣嘅電話，事關一收到佢電話，就要「一筆Out消」，冇得打今屆世界盃。
艾歷臣今日會公布邊二十三位英格蘭國腳，可以參加月底舉行嘅世界盃決賽周。按照慣例，球員如果收到電話，即係話經已被選入國家隊；若然收唔到，就表示入唔到。不過，艾歷臣就嚟一次反傳統，收唔到佢電話嘅球員，先至有份打世界盃。
艾歷臣咁樣做，表面上好似幾殘忍，但係我求大俠就認為臣哥別有用心；事關有佢老人家親自打嚟，嗰班去唔到日、韓嘅球員就算真係好失望，但喺聽過艾歷臣嘅解釋同埋俾佢安撫完之後，起碼條氣都唔會頂住頂住。換言之，英格蘭國家隊嘅士氣亦唔會因此而受到影響。
英格蘭喺世界盃駐紮的地點淡路島因為冇乜夜生活，當地負責人擔心班英格蘭國腳會悶，特別提供電腦遊戲同埋卡拉OK畀佢哋。不過，係人都知英格蘭波士艾歷臣軍紀好嚴，加上英格蘭球員近年經常喺夜店搞到出事，所以就算淡路島有夜生活，睇怕班英格蘭國腳都唔可能去幫襯。
列斯前晚幫效力咗十年嘅加利基利舉行紀念賽（列斯最後輸一比四畀些路迪），以表揚佢對球會嘅貢獻。呢啲賽事通常係畀球員搵銀，但加利基利認真唔話得，將收番嚟嘅七十萬鎊，全數捐畀一個兒童癌症基金，自己冇袋一個仙落袋。加利基利咁有善心，真係值得其他球員學習。
巴西國家隊教練史高拉利冇選羅馬里奧去打世界盃，除咗俾球迷鬧之外，重俾巴西啲報紙話佢經已成為「公眾嘅頭號敵人」。我求大俠都同意羅馬里奧好好波，之但係史高拉利話晒都係巴西隊嘅波士，佢唔揀該位老將，梗有理由嘅，故啲巴西球迷同傳媒應該尊重番佢嘅決定。
早幾日76人教頭布朗向艾華遜下最後通牒，話佢再唔生性，寧願割愛出讓，噚日艾華遜即作出澄清，指佢同布朗關係良好，話自己希望一世效力76人㖭，佢重將自己比喻成布朗後院所養嘅一隻鬥牛㹴，誓要保護主子咁話，真喺肉麻！
求驗客手記逢星期一至五刊出
E-mail: