美股周二跌勢喘定，由於思科系統業績比預期佳，杜指和納指在市後交易時段升勢轉急，但港股同美股「脫鈎」，真係脫得好徹底，噚日又反其道而行，早段高開創出今次升市新高11890後，後繼乏力，行情更反覆下滑，最低之時倒跌近百點，收市11768，跌27點。期指大部份時間都低水，尾段有大戶掃貨，結果高水32點。
大市成交118億元，扣除山東國電（1071）和工銀亞洲（349）配售之數，仍有100億元，成交活躍而市勢未能再進，加上唔少公司趁市旺伸手集資，市場氣氛轉淡，唔排除大市在現水平需再整固多一段時間，才能一舉而衝破12000中期分水嶺的阻力。
和記港陸（715）繼續係炒作的焦點，漲銳退速，噚日質到落0.9元後，又以雷霆萬鈞之勢，連掃11個價位，掃到上1.01元，單係呢一段，起碼成億股轉手，若果係震倉食貨，大戶又如願以償。有關和記港陸會做「披成」嘅消息已傳到好「行」，係真係假，好快知道。
長和系股票噚日以辰達永安（1189）表現較穩定，收9.4仙，跌0.2仙，傳短期內會有大動作，若見衝破10仙且高收，可追入，目標12仙。
早前推介的上海置業（1207），噚日發力而上，高成1.1元後收1.07元，走勢已突破旗形，可向1.2元水平推進。
德信控股（758）在武漢參建賽車場，將來的收益，可大可小，有機會成為「星」級股，可將此股列入要留意之類。
品質國際（243）收3.55元，跌1個位，近期走勢已有見底之兆，若衝破下降通道阻力（3.625元），即可再展升浪，初步目標4元，中期上升目標5元。半導體業已復甦，品質近期接單亦已回升，業界展望下半年情況會繼續好轉，現水平收集，以半年為期，料有理想回報。
郭兆誠