阿董最近受夠《財富》同《經濟學人》踩香港（即係踩佢）嘅言論，好唔容易先等到英國一個研究機構選香港機場為全球最佳機場嘅好消息，當然要大鑼大鼓唱開去。
噚日機場個慶祝酒會，請咗一大棚人贈興，連主持調查嘅英國機構總裁，都專登由英國來港。唔講唔知，原來呢位總裁EdwardPlaisted噚日下午飛來香港，晚上即走，來回飛成三十個鐘，只為出席一個鐘嘅頒獎典禮，都算大陣仗。
不過，又真係值得高興嘅，原來今次訪問咗七十七個國家或地區嘅百四萬旅客，當中有超過二十四萬人覺得香港機場最好。評分因素包括：標誌清晰度、專機方便度、客運大樓舒適度等。
阿董成晚笑到四萬咁口，不停恭喜機管局主席馮國經及其同事。但馮主席就頭痕好多，典禮前又被問新港大校長嘅事，典禮後又要答點面對內地競爭，結果成頭大汗叠細汗，眼鏡都濕埋。好彩有位記者行家好心遞上張紙巾，馮主席先可以抹吓汗。
（圖）馮國經（左）代表機管局接受全球最佳機場殊榮，旁邊的阿董就笑到見牙唔見眼。
E-mail：