美股周二雖然後勁不繼，杜指升幅收窄至28點，但收市後思科對第3季盈利作出較市場樂觀預測，股價急升，帶動杜指期指大升。不過，好友嘅大攻勢並未如期出現，港股噚日表現令人失望，恒指高開78點後反覆回落，最後跌27點收市。
雖然港股偏軟，好大程度受信和置業（083）發15億元可換股債券，拖累地產股下跌有關，但成交大而個市升唔上，有派貨迹象，令趙飛雲感到有些少疑惑，所以午市見恒指升至11850受制回頭，喺0.325元先沽出恒指Call輪9045，一來將利潤兌現，二來減低持貨量。原本尾市亦想將和黃輪9110沽清，但見到期指跌唔落，恐怕中咗大戶震倉陷阱，所以繼續持有。
地產股估計會受信置抽水消息加快調整，短期如再冇其他大型抽水活動出現，港股會在地產股整固完後轉強，假如恒指再一次下試裂口支持位10577不破，下一波升勢突破萬二關機會極大，因此跌近11600附近，可再撈番9045。如果美股噚晚表現如外圍期指咁強勁，而噚日恒指偏軟只係大戶震倉嘅話，則恒指今日將大舉抽上。
趙飛雲