近年好hit嘅護膚品牌Neutrogena一向鍾意搵智慧與美貌並重嘅靚女做代言人，有「翻版紀香」之稱嘅廖碧兒，近日應邀為Neutrogena嘅「光采活力眼霜」拍咗一輯新廣告，聽晚會喺電視首播。據知廣告商今次係睇中廖碧兒嘅一雙大眼晴，覺得佢嘅眼神好sharp，最啱做代言人。
廣告拍咗十二個鐘頭，主要拍廖碧兒嘅眼神，佢應導演要求將個頭固定喺個鐵架上，咁攝影師就可以集中捕捉佢最靚嘅眼神。廖碧兒雖然感到雙眼好乾澀同疲倦，但佢好有專業精神毫無怨言。
由於廖碧兒嘅中文並唔流利，所以佢為咗記對白，都落咗唔少工夫，佢話：「我事前做足功課，將對白用英文做拼音，方便自己去記。」
劉美娟噚日喺尖沙嘴君怡酒店，幫一間美容學校做模特兒，佢即場示範咗一個唐代美人嘅化妝。
原來劉美娟早年曾經拍過一套以唐朝為背景嘅電視劇，今次佢再着番唐朝服裝，令佢諗起好多以前拍劇嘅嘢，佢重話當時只係十七歲，因為成日NG，又拍住謝賢呢啲有經驗嘅演員，覺得好大壓力，所以成日喊。
黎小田前晚揸住架平治房車，喺跑馬地嘅油站入油，佢話啱啱出席完教會聚會。
黎小田話：「我信咗主，真係幾好㗎，溫兆倫同陳曼娜都有去呢個聚會，我重聽咗佢哋啲見證事件，好感動。」黎小田重向記者展示佢喺教會攞嘅福音宣傳單張，佢話：「我會拎返屋企慢慢睇。」
識得李麗珍（珍妹）嘅人，都讚佢對朋友好，佢對藍潔瑛就係一個好例子。當初珍妹開美容院，諗住贊助藍潔瑛減肥，不過藍潔瑛一次都冇去過，其後舖頭生意愈嚟愈好，傳聞藍潔瑛就話自己幫過珍妹做宣傳，要求攞番啲酬勞，連美容院嘅職員都睇唔過眼。雖然珍妹同藍潔瑛之後再冇聯絡，不過啲朋友提起藍潔瑛，珍妹唔單止冇不滿，重託朋友問候佢㖭。
金慧英（金子）冇做娛樂圈之後，真係百足咁多爪，佢喺尖沙嘴開嗰間蚊型飾物舖生意都幾好。最近馮仁昭同佢通電話，佢話𠵱家已經搞緊第二樣嘢，因為早排識咗個內地高人，懂得用氣功減肥同美容，佢同朋友試過覺得正，認為有得做，但個高人每次嚟香港都要申請，手續好麻煩，所以佢最近喺深圳物色緊地方搞氣功減肥同美容店。
庾澄慶喺台灣金曲獎攞咗最佳國語男演唱大獎，佢老婆伊能靜知道後即泣不成聲。而喺庾澄慶攞獎嘅慶功宴上，王力宏、莫文蔚、F4、伍思凱同張信哲都去賀佢。庾澄慶話最初獲提名時，諗過唔想參選，但結果諗唔到會贏。