胡錦濤訪問美國，似乎成果令人滿意，美國佬冇畀香蕉皮佢踩，對佢好客氣，好似錫住晒，驚住影響胡錦濤在中國嘅前途。美國佬當正佢係上賓遊客，唔同佢大講西藏、台灣、人權、法輪功，算係好畀面，畢竟美國人都係想透過呢次高格調訪問，摸清楚Who'sHu啫。
中國人對美國嘅感情，其實係表面冷淡，內裏熱情，人人都鍾意留美。據中貿林多年在中國做生意經驗，行街鄭呢兩年踎喺上海嘅經驗，好多老友曾在中資上市公司做過高層管理人嘅經驗，啲幹部全部緊跟中央路線，只要上頭吹乜風，佢哋就會大罵美國傷害中國人民感情，但骨子裏，自己咁搏命做事，都係希望送子女出洋，首選當然就係美國，只要能搞到仔女到咗紐約、三藩市之類讀書，就會成身鬆晒；但奇怪嘅係，啲幹部唔多睇得起英國，好少為子女到英國讀書而努力奔走，刻意經營。
胡錦濤在美國演講，話中國留美學生現時有五萬幾人，可能未計算埋以前留美而不回國嘅學生；自改革開放以來，留美學生應該數以十萬計，呢班人有啲回流中國，慢慢逐步爬上管理層、幹部層，影響力咪話唔大，以後嘅第五代、第六代領導人同領導班子，分分鐘係留美學生天下。以歷史眼光睇，中美關係只會繼續係互相利用、互相增進溝通，唔會曳得去邊。