行政會議成員王䓪鳴原來好鍾意着迷你裙，不過係講緊佢「做女」嗰陣。王䓪鳴噚日出席港台節目《活出我天地》時，同一百五十位嚟自唔同中學嘅學生交流心得，佢話社會應該尊重青年人嘅文化，重話自己當年好前衞：「因為我鍾意着露背裝、迷你裙、喇叭褲！我阿媽唔接受。」佢惟有用事實證明畀阿媽睇，着迷你裙都可以讀到書嘅！Rosanna年紀輕輕已咁有自信，八方都好佩服。
不過，𠵱家啲學生亦唔弱，有位同學發言話：「你哋上一代嘅人批評𠵱家啲女仔着tubetop，但你哋以前咪一樣着好高叉嘅旗袍！」王䓪鳴事後同八方講：「我嗰代唔着旗袍㗎！再上一代先着。」至於管教仔女心得，王䓪鳴就話會盡量畀自由佢哋，但就唔希望仔女煲電話粥同夜瞓。能夠有個咁開明嘅媽咪，真係幸福。
E-mail：