母親節又帶阿媽去飲茶？你唔怕等位，伯母都嫌悶啦，其實孝順可以很有創意。今年就帶媽媽去見識至IN的母親節Fusion菜啦，一家人在寧靜舒適的西餐廳裏，細意品嘗16道歐陸、日本、中國及東南亞風味的菜式，無論是清淡醒胃之選，抑或大魚大肉菜式，都是為她度身訂做，還有特別美味嘉賓──江瑤柱慕絲和燴伊麵壓陣，既合她心意又充滿驚喜，各位孝順仔女，好趁早訂位嘞。
記者：楊一凡 攝影：陳穎 ImageBoy：天俊
頭盤
1.香煎法國鵝肝
2.芝士煙肉焗生蠔
3.日式蟹子青瓜沙律
4.紫蘇煮香辣美國蜆
5.三文魚青瓜壽司卷
6.香芒蝦沙律
7.三文魚香茄海膽湯
主菜
8.烚龍脷蘆笋卷伴芒果醬
9.燴澳洲羊膝
10.德國鹹豬手配泰式咖喱汁
11.美國豬仔金沙骨
12.燒原隻春雞
13.番茄釀江瑤柱慕絲
14.雜菜碟
15.鮑魚汁燴伊麵
甜品
16.鮮雜果碟（芒果、士多啤梨和奇異果等）
$158母親節套餐於本周末及周日供應，套餐惠顧人數至少六位或以上；每位媽媽均有黑豆漿一杯及獲贈食譜一本。餐廳負責人表示若星期六惠顧套餐必須先訂位，星期日則不用預訂；不過小記覺得都係訂位穩陣，咁抵食容乜易滿座。
為了令羊膝惹味得嚟軟熟可口，大廚花了四個小時去炮製，先將洋葱、甘笋、西芹、番茄、五味子及迷迭香放在肉湯裏熬汁，另一邊馬上替羊膝來個底面香煎，一來鎖住肉汁，二來燴熟會更香口，跟手把羊膝放入湯汁裏，扭慢火燴四粒鐘，結果羊肉索晒湯汁，軟熟出場。
試味報告：本來實淨的羊膝被時間和湯汁征服了，它軟腍得……用叉輕力一扯已骨肉分離，肉汁唔覺意滲入薯茸裏，軟綿綿又鮮味。
很難想像江瑤柱和慕絲會走在一起，但事實擺在眼前，充滿創意的大廚先把帶子撈埋蛋白和忌廉打成帶子膠，跟手混入燒過的日本瑤柱，然後唧入挖空心的小番茄裏，最後給番茄冚上小紅帽，便可出場。
試味報告：鹹香味的帶子慕絲，入口即溶，煙韌香口的江瑤柱，畀你邊𡁻邊回味。
沙律搶眼醒目，牛油果跟鮮蝦擠在黃澄澄的芒果肉當中，材料全都大大粒夠派頭，光是外觀已夠令人流口水，細看原來果肉之間揩了些千島醬汁，原來廚師先用沙律汁撈好切粒的材料，然後才迫入圓形模裏，反轉一「Cup」，就事成嘞。
試味報告：當造的芒果零舍鮮甜，牛油果在不知不覺間潤滑了鮮蝦，感覺既開胃又滿足。
肥美的生蠔在軟芝士、炒香的煙肉和莧菜的護送下進入焗爐，歷時五分鐘的烤焗過程，出爐後芝士完全溶化在殼裏，保住美國蠔的鮮味，直至你揭開芝士，讓鮮味四射為止。
試味報告：跟國民同樣大件得體的生蠔，在焗熟後仍Keep住肥大身形，伴煙肉、莧菜和芝士同吃，夠飽肚。
燒原隻春雞(下)
全仗鮮番茄、雜菜和茄膏出盡全力，把自身色相和美味全盤獻上，才能熬出如此鮮甜豔紅的湯底，當廚房收到柯打後，便加入三文魚及日本海膽入湯裏，像煮生滾粥一樣，一滾即掂。皮薄的燒春雞用雜菜醃足一晚，翌日才入爐烤熟，火力先大後小，高溫讓窈窕的春雞燃燒脂肪，慢火確保內櫳熟透，及留住肉汁。
試味報告：番茄湯很鮮甜，其酸甜不但喚醒味蕾，還徹底誘發三文魚和海膽的鮮味。燒雞雖切件上，但肉汁沒有流失，它在入口一咬那刻，才咇出來。
香煎法國鵝肝(右)
帶媽媽食西餐，點可以唔見識鵝肝真面目？來自法國的鵝肝，撲了薄薄的麵粉後底面煎香，內滑外脆。然後再來客紅椒鮑貝炒伊麵，用鮑魚汁燴至入味，食得特別滋味。
試味報告：鵝肝配脆多士，入口既不油膩，還很香，至緊要係奢侈感覺仍保留。燴伊麵的味道很親切，麵炒得很爽很乾身。
店名：mint
電話：27355887
地址：尖沙嘴廣東道122至126號(港威中心對面)
座位：68個
營業時間：上午11時半至凌晨1時
付款方法：現金及信用卡(A.E.,Diners,Master,Visa)
備註：另有每位$98的母親節下午點心套餐，可於頭盤沙律和招牌小吃中五揀一，伴意粉麵食或薯餅；餐廳亦預備了每位$168的母親節晚餐，共十三道菜式，惠顧人數須至少三位或以上。