同月餅場功夫L傾起，落旺角開舖好考膽識，除驚生意夠唔夠做外，最怕品流複雜。其實商場𠵱家管理良好，好少有不良少年滋事，但單拖犯事友最難防，通常佢哋最愛高買，唔貴唔偷，搞到老闆仔十分頭痛。早前有個細路，經常去裏原宿炒舖偷外套嘅小配件，然後打電話勒索店主，因為外套缺件好難賣出，經驗淺嘅店主只有就範。不過，隨住裏原宿炒風平靜，呢個細路亦冇再出動。
接住另一個綽號「新奇士」嘅高買王就「冒起」，佢身高約五呎八，短髮、黑皮膚、健碩身材，每次出動都攞住個大膠袋扮買嘢行街。聽功夫L講「新奇士」手腳快，膽大包天，較細膽嘅店主都怕咗佢。最愛偷具炒賣性質嘅玩具，目標唔過千蚊都唔偷，偷完之後即攞去二手店放，功夫L估佢「月入」過三、四萬。最近「新奇士」經常到兆萬搵食，假期人多最易見佢蹤影，各老闆要小心。
不過亦有舖頭部閉路電視拍低佢個樣，貼在當眼處以示警戒。唔怪得功夫L話旺角做零售真係考膽識。
主持人：大食Jack
八卦熱報：