剛踏入五月，香港車市看來一片平靜；然而，據亞Mark所知會有唔少汽車代理，正密鑼緊鼓部署新車推出。當中，跟意大利法拉利響超級跑車界，同樣享負盛名嘅林寶堅尼，其中用以取代原有Diablo車系嘅Murcielago，響上周五經已秘密空運咗部右軚新車抵港，而亞Mark亦有幸親睹佢嘅廬山真面目；新車果然係名門之後，不愧為新一代嘅超級跑車噃！之不過代理商嘅嘉信汽車，短期內都唔會將部車公諸於世，事關據亞Mark打聽得知，今勻車廠要求代理方面，要隆而重之搞個大型預展畀Murcielago，以凸顯佢響SuperCar界嘅地位之餘，廠方重希望響陳列室，會有多一部Murcielago新車做DisplayCar咁話；睇嚟新任舵手EddyWong，要費一番心思同計劃至得喇！