早陣子，亞Mark話過今年香港車市，唔單止會有多款新車登場搞得熱鬧之外，而且車行之間嘅人事變動，亦都好厲害㖭！正如早前離開福特嘅JessicaChe，以佢響車行有咁多年資歷，佢嘅去向一直有唔少人關注，想唔到佢小休唔到兩個月，又上任新職喇！
今勻佢得到昔日嘅老闆IanSkeggs賞識，出任近年有唔錯成績嘅富豪汽車市場部經理一職，而且重經已響星期一返工㖭！至於原有位置嘅DamianYip，則獲調升為韓國現代汽車嘅GM，以佢舊日將富豪搞得咁有聲有色，相信嚟緊現代又會有一番新作為喇！其次，亞Mark對Jessica出任富豪新職亦好有寄望；皆因佢歷任萬事得同福特嘅要職多時，對歐、日汽車嘅市場策略瞭如指掌嘛！係富豪汽車Fans嘅你，就不妨留意一下佢哋今年有乜新搞作喇。