名模Danielle可以話係中環蘭桂坊嘅常客，前晚佢又同一男一女外籍人士去蘭桂坊玩，見到記者影相，佢哋好避忌咁彈開。
Danielle前晚一身便服打扮喺蘭桂坊出現，重一袋二袋，攞住幾個購物紙袋，個款似啱啱去完shopping再去蒲。Danielle嘅外籍男伴對於記者嘅追訪十分抗拒，重發晒脾氣向記者爆粗。
不過，呢位外籍男伴就幾有紳士風度，護送Danielle同另一名外籍女友到路口搭的士離開。
另外，噚日凌晨時分，楊其龍攞住隻美國劇集《老友記》嘅碟，一邊講電話、一邊急急腳咁出現蘭桂坊，唔知係咪趕住去還碟呢？
而着住入膊衫嘅翁虹前晚亦同朋友去蘭桂坊蒲吧。
滕麗名同張家輝噚日喺赤柱拍攝劇集《十萬噸情緣》，阿滕着咗一件貼身毛毛衫，頓顯腰圓背厚，即時惹起大肚疑雲，阿滕聽完之後好激氣，佢話：「黐線㗎，可能件衫太窄啫，所以先畀人覺得好似肥咗，但我已經準備積極減肥，希望得到纖體公司贊助我啦！」
任賢齊下禮拜四（十六日）喺紅館舉行個唱，佢今次個舞台會搭建兩個小水池，重會有特別煙花效果。
小齊話：「其實我想畀個夏日party感覺啲歌迷，但係𠵱家重申請緊。我哋成日都要等場館嗰邊批准，搞到人人都鬼咁緊張，因為如果佢哋唔批，到時又要諗過第二啲嘢。」小齊聽日重會去紅館試跳笨豬跳。
葉劍波同埋太太傅明憲，噚日去香港大學鈕魯詩樓，參加「香港大學緊急援助基金」嘅捐款活動。葉劍波今次以海域集團嘅名義，捐咗一百萬元用嚟幫助嗰啲經濟有問題嘅學生。傅明憲話𠵱家經濟唔好，佢哋都希望幫吓經濟有困難嘅學生。
離開咗無綫三年嘅張慧儀，噚日重返娘家開會，原來佢喺後日會起程去馬爾代夫同埋斯里蘭卡拍旅遊特輯。張慧儀話為咗配合陽光與海灘，所以會帶定兩套泳衣，其中一套重會係三點式。不過佢話近排因為成日食消夜，足足肥咗十磅咁多，有一晚就食晒個飯盒先瞓，𠵱家惟有搏命減肥。
原來前日係鄧健泓（Patrick）嘅二十八歲牛一，商業一台嘅DJ前幾日好秘密咁喺直播室同佢慶祝生日。喺節目嘅尾段，Patrick嘅歌迷重唱咗一首生日版嘅《心寒》送畀佢，而一班工作人員亦送上蛋糕，另外有個fans就送咗一隻親手造嘅毛毛熊畀壽星仔。