開工時遇溺慘變「植物人」半年的三十七歲潛水員陳美勝，近日終告不治，遺下妻子帶着僅兩歲半大兒子培仔傷心欲絕，更為缺錢支付殮葬費彷徨。蘋果日報慈善基金即時從殮葬專戶撥款，助遺孀阿芳辦理亡夫的身後事，解其燃眉之急。
「阿勝已經昏迷咗半年，每日二十四小時都要靠儀器呼吸同吊鹽水，我惟有經常喺佢耳邊講嘢，希望有奇迹出現，點知早兩日我接到醫院姑娘電話，話阿勝冇咗呼吸，我帶住培仔即刻趕去醫院，去到只能見阿勝最後一面。」二十六歲遺孀阿芳含着淚說。
阿勝是水上人，從事潛水工程工作逾十年，是家中經濟支柱。去年底阿勝在污水渠進行重開排水口工作時，被水流沖激遇溺，經急救後一直昏迷。阿芳連月來每日均攜同兩歲半幼子培仔到醫院探望丈夫，風雨不改，希望他可以甦醒過來。
如今阿勝不治，令阿芳深感彷徨無助：「阿勝出事之後，多得蘋果慈善基金同讀者嘅捐款，我至有錢交租、同應付培仔嘅生活費，而且可以日日搭車去醫院探阿勝，同埋買成人紙尿片畀佢替換。𠵱家阿勝突然去咗，以後個家剩得我同培仔，真係冇辦法令我唔閉翳！」
阿芳現時強忍着悲痛，為籌錢辦理亡夫的身後事而四出奔走。「我打算將阿勝遺體火化，但我向社會福利署申請咗殮葬津貼後，重欠萬幾蚊至夠找數，呢幾日我周圍搵朋友借錢，又冇乜着落，因為𠵱家經濟唔好，大家都手緊，惟有希望蘋果慈善基金再幫吓我喇！」阿芳向記者訴說。
蘋果日報慈善基金早前轉交讀者善款合共一萬多元給阿芳，助她應付與稚子的生活費。有見阿芳現正缺錢辦理亡夫陳美勝的殮葬事宜，蘋果基金即時撥款二萬元，紓緩其經濟壓力。捐款編號﹕C0320
為援助經濟緊絀家庭辦理殮葬事宜，蘋果日報慈善基金特設立「殮葬專戶」，援助有需要人士在殮葬費上的負擔，請讀者繼續捐款支持。捐款編號﹕A470
暖流熱線
電話:29908688
傳真:23702192
電郵:
網址：