麗新集團主席林百欣大公子林建名，名下淺水灣道三十七號三座頂層複式豪宅，放盤超過兩年，終於有買家，呢位豪客用一千八百幾萬元買咗林公子間屋後，更順手畀多二千三百萬掃埋隔籬個單位，兩間屋合共成六千二百方呎，每呎成交價六千七百六十一元。呢個豪客原來由美聯搵番嚟，美聯阿頭伍創業話買家身份不便透露，只可以講係本地用家，買嚟自住。
淺水灣道三十七號係麗新起嘅，林建名個單位在九六年以約一千七百萬元買入，不過住咗陣就丟空咗，兩年前放盤，𠵱家總算甩身，帶挈埋隔籬鄰舍。
另外，地產老友話有「新界地王」之稱嘅新界鄉議局主席劉皇發，去年十月，成功以四千萬元售出中環蘭桂坊地舖，今年再次委託代理招標，將金鐘力寶中心九樓全層萬四呎出售，估計市值七千幾萬，下個月十八號截標。老友透露，發叔個單位喺高峯期以呎價萬三蚊買入，但力寶中心日前剛錄得四千元歷史新低呎價，看來發叔今次賣寫字樓，都係要蝕大本。
（圖）林建名淺水灣道的複式豪宅放盤超過兩年，近日終於覓得買家，重唔使蝕讓。
E-mail：