黃卓玲因為荷爾蒙失調，突然暴肥十多磅，胸部由33C升至33E，最嚴重是停經三個月，身為EABeauty美容院的代言人，黃卓玲不想影響美容院生意，決定將病情公開，她認為病發的原因，和自己長期減肥營養不良有關。
日前有人目睹黃卓玲去了中環睇婦科醫生，加上她上月尾出席纖體護膚品的宣傳活動時，着了件低胸鬆身裙，明顯比以前豐滿不少，難免令人聯想到她正懷孕。
昨日記者就此事致電黃卓玲，追問之下才知道她因為荷爾蒙失調，導致突然肥了十幾磅，胸部由33C增至33E，最嚴重的是已停經三個月。
黃卓玲說：「其實我自己好驚，本來冇打算將件事講出嚟，但因為我係EABeauty嘅代言人，最近美容院有好多客都問老闆娘點解我肥咗咁多，我唔想影響佢哋嘅招牌，覺得應該交代清楚自己嘅病情。
「我之前一直減肥減得好犀利，成年冇食澱粉質嘅嘢，所以唔夠營養，重搏命做劇烈運動。之前我去泰國拍《FindMrPerfect》，因為套戲係講打拳，我日日不停操拳、跑步同跳舞，係連續七、八個鐘唔停。
「早排覺得個人虛，食咗啲中藥調理，肥咗幾磅，我以為進補咗個人自然會肥啲，但之後我個幾月都收唔到身，重再肥十磅，全身重有水腫嘅迹象，就連胸圍都唔啱戴，要重新買過，我本來係戴33C，𠵱家要戴33E，售貨員話我嘅情況好唔正常，叫我去睇吓醫生。」
黃卓玲續說：「到𠵱家為止，我已經三個月冇月經，我諗住可能心情緊張，所以冇為意，聽完個售貨員講，我先識驚，所以即刻去睇婦科醫生，醫生話我係荷爾蒙失調，至於幾時先可以完全好番就唔知，但我𠵱家拍緊無綫嘅劇集《繾綣仙凡間》，根本冇時間休息，惟有聽醫生話保持心情開朗，希望今個月尾拍完個劇，之後抽番一、兩個月休息吓。
「而噚日我有去過美容院，將件事講畀美容院嘅譚小姐聽，佢知我病都冇怪我，佢哋七月會有個大型宣傳，我都唔知到時會唔會好得番。譚小姐幫我推過淋巴，佢話可能我淋巴閉塞，所以排唔到毒，我都諗住再去check吓淋巴有冇事。」
家庭醫生關嘉美認為，黃卓玲的症狀的確是荷爾蒙失調。
關嘉美說：「亂食一啲含有女性荷爾蒙嘅藥物，月經會亂或者會停，亦會出現乳房腫脹和肥胖的情況，反而未必同減肥有關，因為佢（指黃卓玲）做開劇烈運動同食得少，既然之前月經正常，即係佢嘅身體應該可以適應到呢個習慣。不過佢唔使咁擔心嘅，身體機能會慢慢恢復正常，遲早都會好得番。」
採訪：張止寒 攝影：駱華齡