泰臣同李維士呢兩位拳手喺下月八日會於孟菲斯決戰，大戰當前，兩位仁兄梗係要「造勢」啦。李維士就喺佢近排嗰本自傳入面大爆自己私隱，話自己喺每場比賽前三個禮拜會戒色，佢重比喻話要達到性高潮，就好似跑上咗一條好長嘅樓梯咁，消耗好多精力喎！咁為咗專心備戰拳賽，決定禁慾。
但據我求大俠所知，一直傳聞呢位英國拳手係「基」嘅，要戒女色梗係話咁易啦，但我就好肯定佢嘅對手泰臣就唔會效法嘞，泰臣「鹹濕」就係人都知，如果唔係點會喺多年前淪為強姦犯，重要「踎登」吖！唔畀佢近女色，呢位前度拳王可能會發晒癲，喺比賽個陣唔淨只好似九七年咬荷里菲特耳仔，分分鐘連李維士嘅眼耳口鼻都啱！
小馬噚日打贏帝王，表面上功臣係創職業季後賽新高嘅尼殊，其實我求大俠話幕後功臣係尼爾遜父子兩教頭至真。事緣去到第一節尾段，尼爾遜父子眼見球隊多次被吹罰，就大罵球證；雖然仔仔「硬食」咗技犯，但之後球證好似畀面佢兩父子咁，帝王嘅韋伯同史杜阿高域幾次被侵犯都視若無睹，小馬亦由落後十三分反敗為勝，古賓請到呢兩個老江湖認真有福囉。
英超目前最弗嗰個，一定係阿仙奴嘅龍格保，連英格蘭國家隊領隊艾歷臣都話驚咗呢個瑞典國腳。不過，英格蘭第三號龍門占士就話龍格保喺世界盃期間威脅唔到英格蘭。我求大俠初時以為占士吹水博見報，不過聽落佢講得又幾有point，佢話龍格保喺阿仙奴咁勁，全因有伯金呢個咁好嘅供應者，但瑞典陣中就冇咁嘅球員喇。
孫繼海話晒係將會第一個踢英超聯嘅中國球員，不過中國傳媒對佢就似乎唔多重視；好似前日佢首次返昆明同國足操練咁，喺之後嘅記者會，就只得四個記者到場。事後有傳媒指孫繼海喺記者會嘅態度唔多好，但講真，如果我求大俠係孫繼海，見到咁冷落嘅場面，我都唔like啦！
前晚收費台播嗰場意大利、巴西明星對抗賽最後打成三比三。呢場波唔單止兩隊個陣騎呢，最搞笑嘅就係幫巴西守龍門嘅唔係巴西人，竟然係哥倫比亞籍球員哥度巴，似乎有啲貨不對辦。之不過，呢場波話明係一場慈善賽，加上世界盃就嚟開波，大家勉強收貨啦。
今晚收費台同一時間播兩場大波，球迷梗係唔想錯過任何一場比賽；但係限於技術性問題，錄得一場就錄唔到另一場。好彩公仔箱直播場足協盃決賽，咁即係話球迷可以又睇又錄。之但係若然閣下屋企冇收費電視嘅話，咁就要一條心睇足協盃決賽嘞，話唔定好似上季利物浦贏艾拉維斯四比三咁精采哩。