著名建築師何弢近年專注在內地發展，以上海為基地，生意越做越好，也因此越來越忙，成日飛來飛去，體力精神都支出好大。上星期五傍晚，左丁山接到消息，話何弢喺武漢公幹之際，突然出事，要安排回港就醫，但適逢內地黃金周，好多人放咗假，好令佢啲朋友焦急，希望此文見報之日，佢已經返到香港，平安無事，是所至禱。
十幾年前，一位著名律師到史丹福大學醫學院做心臟手術，復康一年之後，有復發跡象，要再去史丹福。佢返嚟對左丁山一班比佢年輕十幾年嘅朋友講：「只要你年過四十，每日吸煙，飲兩杯咖啡，喜歡食鹹嘢，冇運動，經常飛來飛去，中風就好似傷風咁平常。」
我哋俾佢嚇親，立即「三省吾身」，冇運動，唔吸煙，幾日先至飲一杯咖啡，久唔久飛一次，唔怕中風啩？但係因公職在身，好多朋友要出外公幹，賓架W就時時飛去倫敦或紐約開會，開完就上機返嚟，咁搞法，對心臟嘅壓力好大，唔多健康。賓架W都知唔掂，所以盡量抽時間去游水，戒埋咖啡㖭。何弢年過六十，飛得咁頻密，以後或者要停一停，唔好咁拼搏咯。
現代旅行，一啲都唔優游，淨係出入機場已經俾啲保安程序煩死，趕搭飛機更會心情緊張，加強心臟負荷，年輕時以即時往返紐約為威風，今日覺得當年係儍仔一名。