「要仔唔要乸」大家就聽得多，「要仔唔要公」大家亦可能聽得愈來愈多，但今次「要仔唔要公」嘅苦主，竟然係海洋公園嘅可愛雄性大熊貓安安！
安安同佳佳唔經唔覺已經喺海洋公園住咗三年幾，由於大熊貓係獨居動物，所以安安同佳佳始終都冇「同居」，難怪咁耐都冇乜聽聞佢哋行埋。
雖然係咁，海洋公園人員喺上年六月，就成功將安安嘅精液攞出，重千山萬水咁送咗去四川，替另一隻熊貓女進行人工受孕。能夠進行一個咁偉大嘅孕育過程，真係聞者皆喜。
但時至今日，過咗差不多成年，卻一啲消息都冇，究竟發生咗乜嘢事？
海洋公園董事局成員胡經昌同八方講開，方知原來隻熊貓女真係受咗孕，但就唔知點解佢竟然喺當地走甩咗，好似話已經回歸咗大自然㖭。可憐嘅安安，就係咁連個親生仔一眼都見唔到。
﹙圖）可愛嘅大熊貓安安住咗喺海洋公園三年幾，一直深受旅客歡迎，佢今次無緣無故連自己個親生仔一眼都見唔到，認真可憐。
E-mail：