內地電訊公司頻譜使用費落實提高，基金當作消除不明朗因素，兩隻國內電訊股成為大市上升嘅主力股，唔理美股點樣散法。
中移動（941）升幅1.4%，聯通（762）重勁，升幅3.3%。
電盈（008）依然故我，平收2.05元，中移動同聯通兩隻電訊股咁升法，冇理由「賴低」隻8號仔。
電盈今年1月初，最高2.40元，當時恒指只係高過𠵱家124點，電盈有炒落後條件。大市經常係咁，龍頭股升完之後，到啲落後嘢發威。
撞啱啲熱門電盈Call輪昨日下跌，更加抵買。主角9111收28仙，跌1.5仙，數據靚多一靚，8月到期，溢價得3.7%，槓桿率7.3倍。正股上番年頭高位，9111值6毫。未來幾個月，正股見2.40元嘅機會有冇？有嘅話，9111即係有機會升1倍。
聯通升25仙，Call輪跟足嘅話應升2.5仙。9035升1.3仙，9094升1.1仙，未升夠，博得過。9094靚過9035少少，現價19.5仙，11月到期，溢價3.2%，槓桿率4倍。 章盛