房協馬鞍山曉峯灣畔委託代理收票事件，演變成好似兩大地產代理罵戰，中原施老闆響中原網頁「老施週記」內，批評房協容許美聯收細行嘅入票，處理手法有問題，對其他代理行唔公平，咁以後都唔會再有代理行肯遵守房協定下嘅規則。
房協委任5大代理行為曉峯灣畔收票，蘭西聽講出入該盤嘅代理都要帶牌以作識別，唔同顏色代表唔同職級，據講原來白色嘅係代表「無底薪員工」，有人質疑呢班唔知係咪全職代理。
香港置業早前搞嘅「英雄宴」，主要係想同傳媒多啲溝通，每次都有唔同嘅高層同記者一齊食飯，今日重請埋特別嘉賓，就係恒隆地產代理嘅代表。
成日有新意思的規劃地政局，最新搞作是將旗下網頁重新設計包裝，以用家主導。蘭西被抽中試睇，覺得新網頁畫面設計簡潔易明，資料清晰，同以前最大分別是，開首已將規劃地政局屬下多個政府部門連結埋，唔使好似以前要click出政府主頁才搵得番。該局發言人說，最新版本日內將正式啟用。
蘭西