提到意粉的由來，眾說紛紜，有說是馬可勃羅在東遊時迷上中國麵條，後來將之帶回意大利，幾經改良後演變成現在的意大利粉；亦有說是阿拉伯人征服西西里島時，把小麥帶入，西西里人為方便進食，把小麥粉製成條狀而成了意粉。而今日介紹這間走大眾化路線的新張意粉店，不但有數十款由廚師即席炮製的意粉讓你品嘗，喜歡的話還可選擇自己揀配料、醬料及意粉種類，創作一個完全屬於你的獨家自創意粉。
記者：黃婉冰
攝影：陳穎
可以做到日賣300多碟的佳績，全因大廚知道香港人的口味，千揀萬揀，揀至多人鍾意的煙三文魚同蟹籽做材料，配以白酒汁意大利幼麵，脆卜卜蟹籽可以令口感大增，而煙三文魚的鹹味與白酒汁最匹配。除大利幼麵外，另可選擇其他意粉供選擇。
為迎合各類客人的需求，餐牌內除西式意粉、飯外，另有多款中式焗飯和炒粉麵，這款中西合璧的涼瓜牛肉粒焗飯，做法可能同平時阿媽煮開嘅有啲唔同，用豆豉炒香苦瓜同牛柳粒，鋪滿飯面，淋上西式忌廉肉汁，撒上巴馬臣芝士焗，中菜西食，味覺一新。
行政總廚Eric：涼瓜牛肉焗飯集中西口味同烹調方式，好多客人食完都好鍾意，我哋會將涼瓜特別處理過，所以入口唔會苦澀，呢款焗飯開店推出以來都好受歡迎。
意國的地道烹調方法簡而清，只會加橄欖油和一種自製、由辣椒乾磨成的辣椒粉，但其辣無比，香港人未必能夠接受，所以改用新鮮辣椒絲，加入蜆肉，辣度大減，蜆肉有咬口，較適合本地人口味。
食意粉唔要汁又唔要熱，重有咩選擇？呢款頭盤螺絲粉沙律點睇呢？用最適合做沙律的螺絲粉，用橄欖油撈過，使其入口更爽滑，配以青口、蝦、鮮魷等海鮮，混入酸味較重的千島醬，清清哋，最適合正進行瘦身計劃的人。
貌似飯粒的是傳統意大利米形粉，大廚Eric表示雖然外形似白飯，但其口感與味道都同意大利粉無分別，一般只會在當地的小餐館食到。旁邊的雞胸肉亦依照地道意式做法，即在雞肉外包上芝士、較香但淡口的意大利火腿，再包上豬網油，慢火煎香外表再焗，讓焗爐的熱力慢慢滲入將雞肉煮熟，而達至嫩滑的效果。
潮流興crossover，呢樣搭嗰樣，所以呢度有得畀你自由配搭，人客可自選各種配料加不同意粉、醬汁或上湯。這款以雜錦海鮮加蜆殼粉配泰式咖喱汁，配搭較特別，少辣的紅咖喱汁代替一貫的忌廉、茄汁，讓味覺來一個新刺激。
店名：ONEONEPASTA壹壹意
電話：25679969
地址：西九龍海庭道18號奧海城二期高層地下UG06A號舖
座位：120個
營業時間：上午11時45分至下午3時（2時半lastorder），晚上6時至11時（10時半lastorder）。
付款方法：現金及信用卡（Visa,Master,Diners）
備註：每款意大利粉均奉送餐湯一客