【本報訊】傳出婚外情的東亞銀行主席李國寶，在南韓漢城出席一連四天的會議後，昨日返港，他於早上八時多在漢城朝鮮酒店大堂，被記者問到坊間傳聞他另有一位名叫LauraLeung的「真命情人」時，他立即說：「我冇嘢講。」及一再重複：「我唔知喎。」
李國寶離開酒店前往機場時，友善地答應載本報記者一程，記者在車上問他有傳聞指LauraLeung才是他的「真命情人」，他面色一沉說：「唉！鍾意點寫就點寫啦！」再問他是否認識LauraLeung，他說：「識，朋友嚟嘅。點寫就點寫啦，我唔介意！」然後一路上沉默無聲，翻閱英文報章。
在直飛香港的頭等機艙內，只有李國寶一位乘客；在三個多小時的航程中，他應本報記者要求，招呼記者到頭等機艙，在跟記者閒談及接受訪問約一小時。
記（記者）：點解唔出來澄清緋聞？
李（李國寶）：澄清呢，我就唔鍾意，因為解釋即係掩飾。佢哋鍾意點寫我都唔緊要，何況呢啲係我嘅私生活同關於我家庭嘅，我無必要同人交代，因為我以後都唔會回應呢件事嘅問題。
記：其實呢件事係點？
李：誤會嚟嘅，我同佢都係朋友。今次重影響咗人哋，都唔知人哋屋企點睇。
記：你有冇聯絡佢？
李：冇喇，（擰擰頭）暫時都唔會喇，遲吓丟淡咗件事先啦。
記：你太太有冇嬲？
李：都冇嬲。
記：你點解搬去酒店住？
李：因為工作上需要，我好多時要早瞓，朝早四、五點起身出去，有好多morningmeeting（晨早會議），暫時呢輪都好忙，住着酒店先。
記：你兩個之間有冇問題？
李：（擰頭）冇問題。
記：對於傳媒嘅追訪，你會唔會覺得好煩？
李：唔緊要，你咪跟住我囉，我每日嘅行程都可以話畀你聽，我都係工作之嘛，我好忙，我今晚返去又要開會，聽朝一早又出去，如果你聽日搵我就要早啲喇，我五點九左右出去。
航機約於下午一時返抵香港，李國寶隨即趕赴公司開會。另一方面，李國寶太太潘金翠昨日下午三時多離開中環東亞銀行大廈時，被記者問及有否與剛回港的丈夫聯絡，她只微笑而沒有回答。
韓國→航機→香港追蹤報道