「九哥台」最近推出咗個「流動票房#133」，其實同「C記」以前嘅「M-ticket」大同小異，重要配合Nokia6510嘅電子錢包功能一齊先用到。不過今次要講嘅唔係呢個服務，大家如果有行開「九哥台」啲大舖，就會見到相當搞嘢嘅情景，佢哋竟然要啲Sales着住戲院帶位嘅制服，再加埋戲院入場布幕做布景。王子見到之後，就搵個「九哥」Friend問問情況，點知個個都燶口燶面，垂頭喪氣。梗係啦！戙喺條街度俾人指指點點喎！其實扮帶位都冇乜嘢啫，假如「數記」要搞嘢，咁咪全部要扮蜘蛛俠？最頂癮可能係「123」，如果Sales幫隻WAPGame《武林英雄傳》做Promote時，重唔變晒華英雄、王無忌同石黑龍？