美股周一大插水，恒指噚日跌近裂口位反彈，趙飛雲按原定計劃喺0.295元買咗30萬份恒指Call輪9045博反彈。
午市恒指繼續升，最後升59點，收11796。港股由跌轉升，可能啟示美股噚晚會反彈，好友正部署大攻勢。睇番杜指日線圖，3月19日杜指升至10673見頂回落，跌至4月29日低位9811後，跟住連續3日反彈，上周四最高升至10117，然後連續2日大跌，前晚最低9807，保住9800支持位，加上杜指9RSI出現背馳，噚晚出現反彈十分正路。
前日提過和黃（013）如果繼續升，應將和黃Call輪9110換馬至9050，噚日9110升5.6%，而9050升12%，可惜趙飛雲換唔切。不過，和黃會喺今個月14號除息1.22元，除非和黃呢幾日破關而上，否則9110數據亦唔係太差，當然，現時新買則以9050較佳。
大摩調高滙豐（005）投資評級，但股價反為微跌0.25元，收95元，有些少趁好消息出貨味道。由於預計恒指將升破萬二關，滙豐再回幅度有限，若見回至94元附近，可先買1注滙豐輪9040。此外，地產股調整將完，亦要留意。 趙飛雲