批股集資行動一浪接一浪，小初真係有多少擔心會影響炒家剛剛冒起嘅炒股意欲，好似幾隻近日炒到癲嘅股份，例如光通信（603）、益安（082）同埋和記港陸（715）咁，噚日好似略見疲態，最怕炒家借勢調整，一個唔該殺落嚟。
不過，經紀陳叫小初唔使咁早擔心住，佢話成班大陸炒家抬錢落香港冇耐，斷估都未咁快炒完。
飛天朱嘅華德豐（297），停咗咁耐牌終於開嚟見人，隻股噚日最高見過53仙，收48.5仙，雖然收市仍然升14.2％，但原來幾乎係全日最低位，反映沽壓唔輕。
經紀陳話，隻股停咗咁耐，復牌有人沽貨唔出奇，但計落批咗咁多貨出街，一時三刻散貨並唔容易，所以佢話隻股重有一番波動。
至於點解隻股停咁耐？佢話接近公司嘅消息人士話，喺交易所審批通告時有好多嘢問，所以先至搞耐咗。 慕容小初