踏入五月又係食荔枝嘅時候啦！去年荔枝價都相當貴，今年就唔同，因為大陸荔枝豐收，聽講嚟緊嘅荔枝會相當抵食，六至九月係荔枝盛產期。而喺未全面上市各類型荔枝時，等我肥師奶先介紹呢款價格比去年平嘅妃子笑大家食，食味爽甜，汁多核細，有啲近似糯米糍，往時要十六、七蚊磅，今年平咗好多，荔枝迷千萬不容錯過啦！
$10-$12磅
部分果檔有售
見啲仔女平日都算聽教聽話，有好嘢飲都會買返嚟畀我飲，就等我又買番啲嘢𠱁佢哋開心吓，估唔到呢款啫喱飲又𠱁得佢哋鬼咁開心，日本出產果然係架勢啲。啫喱飲有得飲又得食，樽內有飲品又有粒粒嘅啫喱可以𡁻𡁻吓，有齊兩種口感，除咗黑提味之外，重有桃、雜果味供選擇。
$16.8 崇光Freshmart有售
文：肥師奶