美股周一跌穿1萬點心理關口後大瀉近200點，市場傳聞有基金曾於911事件後撈底，現在開始獲利回吐，美股步入整固期，港股與美元掛鈎，理應難以獨善其身，不過恒指噚日就先跌後升，升59點，真係比想像中厲害，港股後市應該會試穿12000關口。
意科控股（943）近日跌至0.107元低位有支持反彈，噚日收0.143元，可惜成交已大不如前，後市難寄厚望。好多朋友關心此股重有冇得玩，據聞有人同班中資傾緊點樣將此股起死回生，可以留意。
電腦器材分銷商偉仕控股（856）公布，公開發售獲得132倍超額認購。黑客話，偉仕招股總數2.17億股，每股0.25元，80％售予機構性投資者，20％公開發售。據聞配售部份有一班好齊心嘅捧場客，亦有唔少機構性投資者一方面喺配售部份買貨，同時又認購公開發售部份，所以公開發售部份之認購額谷得頗大，上市初期股價估計有不俗表現，要見0.30元相信唔難。
科聯系統（046）噚日股價勁升24％，有人話受到深圳國際（152）帶動。深國曾發可換股票據畀長和系，結果因為深國股價偏低冇行使到，但長和系選擇喺市場吸納，消息曝光後，深國股價大幅上升。
長和系亦曾於00年購入一批科聯可換股票據，所以市場亦認為此股具同樣概念。不過，由於長和系已行使換股權，除非長和系想增持，否則毋須在市場吸納。 阿虎