鍾麗緹（Christy）主演嘅電影《色戒》（Samsara）後日上映，早排呢部戲喺法國舉行全球首個首映禮，Christy同男主角古桑專程飛去法國出席盛會。喺法國首映禮上，Christy同古桑不但有講有笑，而且重手拖手兼搭膊頭，好鬼老友。
今次法國之行，Christy可謂幫華人攞晒彩，事關《色》片導演賓納倫喺首映禮上大讚Christy有語言天份，識講藏語同泰文，台下就有法國人好寸咁大叫：「係囉，淨係唔識法文吖嘛。」殊不知Christy用好流利嘅法文喺台上發言時，台下啲法國人即刻目瞪口呆，事關佢哋唔知Christy喺加拿大蒙特利爾長大，法文係佢嘅主要語言，講法文又點會難倒佢呢？
蔡慧敏前晚獨自揸Benz跑車喺跑馬地出現，佢停好車之後，去銀行櫃員機提款，佢見到有記者在場，即友善同記者閒談近況，講到興起之際，蔡慧敏唔記得自己正在提款，到醒覺時，提款卡已經俾櫃員機食咗，蔡慧敏惟有打消㩒錢嘅念頭。
馮仁昭前日傍晚喺金鐘太古廣場，見到保安局局長葉劉淑儀同個女性朋友逛街，只見葉劉淑儀着咗件黑色緊身上衫同紅色緊身褲，逛完Esprit就逛Mango。喺Mango間舖頭時，雖然有唔少顧客同售貨員向佢行注目禮，但葉劉淑儀就一派悠然自得，照舊睇衫好少理。
李心潔同周俊偉合演嘅恐怖片《見鬼》上周六喺銅鑼灣紐約戲院舉行優先場，李心潔喺戲中飾演一名失明人士，後來接受一名泰國人捐贈眼角膜，點知佢回復視覺之後經常見鬼。戲中最恐怖部份，係講李心潔嘅陰陽眼睇見一位母親抱住個仔喺燒臘舖舔叉燒嘅情景。
徐克前日對台灣記者話，今年佢會開一部科幻新片《銅頭人》，佢重屬意由張栢芝做女主角㖭。
張栢芝會扮演一個有銅頭殼嘅女警，呢個銅頭殼好犀利，皆因擁有神秘力量，而呢部戲重會大玩電腦特技，係徐克今年嘅重頭作。
康城影展本月中舉行，貿易發展局到時會喺影展舉辦一系列活動去推廣香港嘅電影業，包括本月十八號喺康城舉行「香港之夜」晚會。
上年貿易發展局用咗八百萬經費，據知今年嘅預算就增加到一千萬，重請咗張曼玉、梁朝偉同埋導演關錦鵬、唐季禮一齊參與，由貿易發展局理事會成員周梁淑怡帶隊過去。
孫燕姿為新碟《Leave》拍MV同宣傳照，特別遠赴新西蘭嘅大雪山取景。孫燕姿喺零下五至十度嘅寒冷氣溫下工作，重要着背心影相，可謂有苦自己知。不過，當孫燕姿去到雪山時，首次目睹雪山嘅宏偉，一度開心到尖叫起嚟，重大字形瞓喺雪山度。
吳美珩噚日現身中環，問佢嘅近況，佢話早排同郭晉安及林峯去新加坡登台，近日先放假，𠵱家構思緊去旅行輕鬆吓。
講到最近本港兩大連鎖超市嘅豬肉減價戰，觸發豬肉商發動堵塞屠房行動，令豬肉商同市民都有損失。吳美珩噚日話：「係呀，我都有留意呢單新聞，對我都有影響㗎，因為我最鍾意飲豬𦟌湯嘅，𠵱家就冇得飲啦！」