大戶似乎早有準備，先喺外圍抽高滙豐（005）股價，由於滙豐做好，恒指噚日只係低開18點，稍為跌穿11750就掉頭挾上，雖然升至11845便回頭，跟住反覆偏軟，但跌近上周四嘅密集支持位11650附近，已經跌唔落，午市更收復些少失地，最後只跌61點，收11736。
睇嚟今次恒指整固，唔會補番上周四嘅上升裂口11577至11497，即係話恒指可能再試一試11600水平就完成調整，向萬二關進發，可以喺11600附近撈番恒指Call輪9045。
藍籌股中除咗中移動（941）及新地（016）調整稍大外，其他表現硬淨。和黃（013）初段跌至69元已經跌唔落，最後倒升0.25元收市，和黃Call輪9110升5.8%收市，令趙飛雲有些少喜出望外。短期而言，如果和黃大幅破位而上，須換馬至和黃法興輪9050，隻輪行使價70.77元，一旦由價外變成價內輪，將會跑贏9110。不過，若和黃只係窄幅上落，則繼續揸住9110。同樣情況適用於滙豐，若滙豐大幅升破96.25元，放棄買滙豐Call輪9030，改為買入滙豐麥銀輪9040。
光通數網（155）一提就急升，趙飛雲唔想高追，所以冇買到，等遲啲再考慮。
趙飛雲