陳淑蘭（蘭子）與方中信拍拖之前，原來曾與黎明發展過一段登台情緣，可惜因蘭子自卑心作祟，認為自己襯不起貴為天王級的黎明，所以主動提出分手。
早前陳淑蘭（蘭子）接受有線娛樂台，將於本周五（十日）晚播映的《好女人系列》錄影訪問，主持人毛舜筠問及她的感情生活時，蘭子竟自爆她與黎明在九一年曾發生過一段情。
原來，毛舜筠與黎明和蘭子等人，九一年曾一起到美國登台，所以毛舜筠對蘭子與黎明拍拖一事，早已一清二楚。在日前訪問中，毛舜筠特地追問蘭子與黎明的感情事。
蘭： 陳淑蘭 毛： 毛舜筠
毛： 你哋有冇開始過？
蘭： 怕唔怕㗎？
毛： 唔怕，大個女啦嘛。
蘭： 死啦，面紅㖭，當我暗戀佢，好唔好？
毛： 都唔係呀，你哋都好好嘅，不過可能大家太多壓力啫。
蘭： 我同方中信之後，我曾經同自己講，我一生最愛兩個男人，一個係黎明，一個係方中信。其實當初我未接觸過黎明之前，好憎黎明，覺得佢唱歌五音不全，但自從九一年同佢一齊去美國登台之後，就覺得佢好可愛。
蘭子表示，那次登台，她與黎明一起合唱《祗有情永在》，因她忽然忘記歌詞，黎明便捉實她的手，然後用口形提她歌詞，蘭子說：「我係一個好容易被人電到嘅人，佢捉住我嗰陣，我當堂領晒嘢，佢眼神原來好厲害，佢提我歌詞嗰陣，我覺得呢個人係保護我，係英雄。通常去到外地，大家都會互相照顧，所以後來佢同我好多時都會一齊。尤其去到外地冇乜壓力，咁咪放縱一吓。」
蘭子又說在遇上黎明之前，還未知道甚麼叫愛，她說：「我成日祈禱，希望有機會畀我知道乜嘢叫做愛，結果冇幾耐就去登台，當時個感覺就好似喺雲上面飛，係一個好飄然嘅日子，好開心嘅日子。
「你知佢應該識好多靚女，但佢都會用眼神嚟望我，我但求開開心心，咪話畀自己聽呢個係fantasy囉。我同佢講，返到香港之後大家唔會再見，一切都會完，估唔到返到香港之後重會搵我，我好開心，我試過call佢機，話我好愛佢，但我冇期望可以同佢發展，佢係一個天王，我覺得我襯佢唔起。」
所以蘭子決定將一切放低，她說：「呢個白馬王子個個都想擁有，由始至終係自己一廂情願。」原來，蘭子與方中信尚未開始正式拍拖時，蘭子曾經患病，當日黎明傳呼她欲問候一番，方中信剛好在她身旁，基於妒忌心理，方中信一度要蘭子回覆黎明，着黎明以後不要再找她。