榮譽博士就聽得多，榮譽院士其實更高級。噚日中大頒授第一屆榮譽院士名銜，六位知名人士得到呢個榮譽：李兆基、鄭海泉、李福善、劉尚儉、胡秀英教授同KennethHobbs教授。後三位讀者可能比較陌生，胡秀英教授係九十三歲嘅著名植物學家；KennethHobbs係有名嘅肝病專家。劉尚儉則係香港寶業集團主席，經常贊助大學學術活動。
至於四叔（李兆基），攞到呢個榮譽心情顯然好好，雖然戴四方帽時，佢同李福善都錯將帽上的絮帶放在左邊，要工作人員提點改正，但四叔噚日顯示嘅精靈，連兩個仔都比唔上。事緣記者問四叔：「諗住點慶祝呀？」四叔：「大學今晚有餐飯食㗎嘛！」記者轉頭又問四叔大仔家傑點同老竇慶祝。家傑：「今晚返屋企食飯囉！」記者奇怪：「唔係喺大學食咩？」家傑𢱑晒頭，拍吓大佬家誠膊頭求救。家誠惟有話：「等我confirm一吓。」結果，梗係老竇資料最正確，證明四叔幾精靈，正是老竇教落，有得食千祈唔好嘥。
E-mail：