打開電視機，幾乎個個台都講波經，就知道差唔多又係時候開始踢世界盃。有人四處撲飛，誓要親身感受現場氣氛，無咁好彩嘅就惟有留喺屋企睇直播，重有無第三個選擇？當然有，今年就有美式餐廳為迎接世界盃，而推出世界盃美食燒烤自助餐，除咗各款烤肉任食外，又有最受球迷歡迎嘅四個國家美食代表隊侍候左右，他們會將各款烤肉端到你面前，你只要安坐睇波，就可以品嘗到熱辣美食，呢種睇波方法都唔錯！
記者：黃婉冰
攝影：陳偉強
移居巴西的日本人為數不少，所以大廚靈機一觸，想到以日本的燒肉汁來醃牛肋骨，美國牛肋骨與日式燒肉汁共處超過三小時後，放入焗爐內消脂，再用烤爐烤至七、八成熟，控制火力來保持肉汁。
大廚德哥：美國牛肋骨淨係來貨價都好貴，所以少有餐廳會用，呢隻骨本身肉質好鮮嫩，脂肪唔多，燒過之後入口依然嫩滑，肉中帶有少少脂肪，但咬落唔會肥膩油淋淋，好滑，絕對係重點推介。
牛仔髀可算是燒烤餐廳中的稀客，沿用巴西傳統的果汁醃製方法，利用新鮮橙汁的酸性，把肉質變得鬆化，至於味道就靠Rosemary迷迭香將牛肉深藏不露的鮮味盡發揮。醃過的牛仔髀先焗後烤，除了可以將多餘脂肪排出肉外，經火山石烤過的肉亦會增添一分燒烤香。
曹永廉試味：我自己本身好鍾意食肉，呢度幾款烤肉之中我最鍾意牛仔髀，肉質有口感，唔會好韌，帶有少少牛仔肉嘅羶味；呢度可以任食又可以睇波，氣氛好，咁嘅價錢都算合理。
不知是否情意結，巴西人對球類永遠有一手，踢波叻，整芝士薯仔波一樣咁叻。用薯仔粒混入芝士、芫荽籽、雞肉粒，大廚刻意將薯仔粒煮至半生熟，令薯仔波更有咬口，蘸上麵包糠炸，比起足球，芝士球一樣廣受歡迎。
試味報告：入口有薯仔味又有芝士味，兩種味道互不相讓，薯仔粒令口感提升，雞肉粒不會太多，恰到好處，每粒都有乒乓波咁大，食一兩粒都夠晒。
香腸、牛扒以外，阿根廷最傳統的食品就是這款闊蛋麵，用生牛油煮麵，牛油內的牛奶成份令麵條更滑溜，以白酒、忌廉、番荽碎做汁，加入美國鵝肝醬同煮，有鵝肝的香，但沒有整片鵝肝般膩。
Mandy試味：我鍾意闊麵個味道，入口好creamy好滑，鵝肝醬茸有質感，但唔會好膩，麵條軟硬適中，清清哋啱女仔食。
香腸並非德國人專利，阿根廷都有自家製香腸，這款有香濃阿根廷香草、芫荽籽的牛肉腸，送啤酒最啱。除各種肉外，巴西人連生果都照燒可也，選用加拿大當造桃駁李，在表面塗上牛油和混有砂糖的鮮橙汁，將李皮的苦澀味遮蓋，燒至半熟再撒上肉桂粉，可突出李的甜香味。海鮮方面亦有南極大蝦做代表，肉質爽口鮮甜。
Jane試味：桃駁李燒得外脆內軟，肉桂粉味同桃味好夾，外面層蜜糖燒得好脆，燒過重有好多汁，食法好特別。大蝦就肉質好爽好大隻，味道調校得好，唔會燒得好乾。
英格蘭球隊出名，肉餡批同樣備受當地人歡迎。纖維較多的新西蘭肉眼扒最好用來燜，因為即使經長時間燜至入味都不會變得溶溶爛爛，踢走勁羶的羊腰換來豬腰代替，用紅酒、燒肉汁、乾葱粒、迷迭香等燜起碼兩個鐘至入味，再鋪上酥皮焗，熱辣登場。
試味報告：酥皮搓得夠薄，肉眼粒燜得夠入味，豬腰爽口，與牛肉粒兩種口感，聽大廚講用酥皮夾住一齊食，紅酒汁滲滿酥皮，可以食得更原汁原味。
店名：Eureka
電話：25061689
地址：銅鑼灣時代廣場食通天13樓1305舖
座位：220個
營業時間：星期日至四中午12時至午夜12時，星期五、六及公眾假期前夕中午12時至凌晨2時。
付款方法：現金及信用卡（Visa,Master,AE）
收費：星期日至四晚上8時前結帳成人$118，8時至9時半入座成人$148，9時半後入座成人$98；星期五、六及公眾假期前夕晚上8時前結帳成人$128，8時至9時半入座成人$168，九時半後入座成人$108；10歲或以下小童任何時段收費一律$68。另星期一至日午市成人一律$58，小童，一律$48。
備註：另加$19可任飲果汁及汽水，加$39可任飲紅酒及啤酒。