律政司司長梁愛詩雖然貴為香港法律界嘅阿姐，但原來詩姐當年入行也有一番辛酸史。話說六十年代初，梁愛詩打算申請做見習律師，佢當時在法律界無任何聯繫，所以好難搵到導師。
一個詩姐好希望搵佢做導師嘅人直言，冇諗過請女見習律師，因為佢哋會成日去洗手間化妝，甚至閃去購物，對專業唔認真。呢個人重叫詩姐學好速記同打字，即使做唔成律師，都有啲秘書技能；學完之後至再考慮請唔請佢。個導師雖然咁寸，但詩姐一啲都冇退縮，真係去學嘢，亦終於被聘用。
點解詩姐咁大感觸？事緣佢昨日出席太平洋地區律師公會周年大會閉幕酒會，致辭時講到女律師行業發展。佢話𠵱家香港女律師嘅前途好咗好多，本地法律學生其中六成係女性。律師行合夥人同資深大律師方面，女性分別僅佔百分之二十一同百分之七，同佢入行時差好遠。
E-mail：